Օգոստոսի 19-ին Հայկական կարմիր խաչի ընկերության արագ արձագանքման թիմը, որը հերթապահություն էր իրականացնում Սևանի հանրային լողափում, ականատես լինելով ավտոթվարի, անմիջապես արձագանքել է դեպքին։
Կամավորները զգուշացրել են, որ պետք է փակել գազատարը՝ գազի արտահոսքից խուսափելու համար։
Վարորդին, որն ուներ ոտքերի բաց կոտրվածքներ, ցուցաբերվել է առաջին օգնություն՝ դադարեցվել է արյունահոսությունը, իրականացվել է վերջույթների անշարժացում։ ՆԳՆ ՓԾ ջրափրկարարների ժամանելուն պես՝ կամավորներն օգնել են տուժածին պատգարակով տեղափոխել նրանց մեքենա։ Հայկական կարմիր խաչի կամավորներից մեկն ուղեկցել է տուժածին մինչև Սևանի հիվանդանոց՝ ճանապարհին վերահսկելու նրա վիճակը։
Մինչ կամավորների մի մասն առաջին օգնություն է ցուցաբերել, մյուսները հոգեբանական առաջին օգնություն են ցուցաբերել ականատեսներին։
Ժամը 21:00-ի սահմաններում 28-ամյա Սարգիս Ք.-ն իր վարած Opel Astra մակնիշի ավտոմեքենայով Երևան-Սևան-Իջևան ավտոճանապարհի 66-կմ հատվածում, դեռևս անհայտ հանգամանքներում, դուրս է եկել ճանապարհի երթևեկելի գոտուց, բախվել գազատար խողովակի երկաթե արգելապատնեշներին և մոտ 30 մ գլորվելով կիսակողաշրջված վիճակում հայտնվել Սևանա լճի լճափնյա հատվածում:
ՀԿԽԸ Գեղարքունիքի, Տավուշի, Վայոց Ձորի, Սյունիքի, Արարատի և Երևանի մարզային մասնաճյուղերի աղետների արագ արձագանքման թիմերը՝ ՆԳՆ Գեղարքունիքի մարզային փրկարար ծառայության հետ համատեղ, հուլիս-օգոստոս ամիսներին հերթապահություն են իրականացնում Սևանա լճի երեք հանրային լողափերում՝ անհրաժեշտության դեպքում առաջին օգնություն ցուցաբերելով հանգստացողներին։ ԱՕ ծառայությունն իրականացվում է Կարմիր խաչի միջազգային կոմիտեի հետ համագործակցության շրջանակներում։
